Միշլենյան աստղ, ինչ է դա, ինչպես ստանալ այն-Մաս առաջին

^{Միշլենյան աստղ, ինչ է դա, ինչպես ստանալ և արդյոք սպասել այն հայաստանում- Մաս առաջին}

^{Հոդվածի մասնակի ինֆորմացիան վերցրված է միշլենյան պաշտոնական կայքից՝ ( guide.michelin.com ): Հոդվածը շարադրվածէ մեր բառերով, ինչպես որ կա: Հնարավոր են սխալներ, տեղ-տեղ ռուսա-անգլերեն արտահայտություններ, ժարգոնային արտահայտություններ: Հայեցի և գեղեցիկ հայերենով հոդվածի չսպասել😊:}

Սկսենք ամենասկզբից, Ի՞նչ է MICHELIN աստղը

MICHELIN աստղ նվիրվում է հիանալի, աչքի ընկնող խոհանոց ունեցող ռեստորաններին։ Շնորհելուց հաշվի են առնվում հինգ ունիվերսալ չափորոշիչներ՝ բաղադրիչների որակը, ճաշակի ներդաշնակությունը, տեխնիկայի վարպետությունը, խոհարարի անհատականությունը, որն արտահայտվում է իր խոհանոցում և, վերջապես, ոչ պակաս կարևոր՝ հետևողականությունը ինչպես ճաշացանկում, այնպես էլ ժամանակի ընթացքում։

‍Ինչպե՞ս են շնորհվում միշլենյան աստղերը

Ամեն տարի փնտրվում և շնորհվում են նոր աստղեր: Նոր աստղեր փնտրելու հետ մեկտեղ նրանք շարունակաբար վերագնահատում են գոյություն ունեցող աստղային ռեստորանները՝ վստահ լինելու համար,որ հյուրերին առաջարկվում է կերակրատեսակներ պատրաստելու նույն բարձր մակարդակը:

Ռեստորանի ինտերյերը, թանկարժեք գույքը հանդիսանու՞մ են արդյոք գործոն աստղ շնորհելու համար

Ո՛չ։ Միշլենյան աստղ/աաստղեր շնորհվում են միայն ափսեի մեջ դրված սննդի համար, և ուրիշ ոչինչ: Ռեստորանի ոճը, ինտերիերը, ձևավորման պարագաները կապ չունեն մրցանակի հետ:

Ովքե՞ր են տեսուչները։ Ո՞վ է կայացնում որոշումները:

Որոշումները կայացնում են Michelin-ի հայտնի անանուն տեսուչները՝ բոլոր լրիվ դրույքով աշխատողները, ռեստորանային և հյուրանոցային բիզնեսի նախկին մասնագետները: Այն բանից հետո, երբ մի քանի տեսուչներ ճաշել են ռեստորանում, նրանք թիմի հետ քննարկում են իրենց փորձը՝ վերջնական որոշում կայացնելու համար:

Քանի՞ անգամ եք ճաշում ռեստորանում, նախքան նրան աստղ շնորհելը:

Այնքան, որքան անհրաժեշտ է ամբողջական պատկերը ստանալու համար: Հետևողականությունը շատ կարևոր է Michelin աստղեր շնորհելիս, այդ իսկ պատճառով տարբեր տեսուչներ ողջ սեզոնի ընթացքում այցելում են ճաշի և ընթրիքի՝ ինչպես հանգստյան օրերին, այնպես էլ շաբաթվա ընթացքում:

‍Ի՞նչ են պատվիրում։

Տարվա ընթացքում նրանք փորձում են հնարավորինս շատ կերակուրներ ուտել, քանի որ պետք է հասցնեն շեֆ- խոհարարի կողմից առաջարկվող շատ ուտեստներ փորձել: Նրանք պետք է վստահ լինեն, որ խոհանոցում պատրաստված բոլոր ուտեստները մշտապես բարձր որակի են։

Ինչպես են նրանք այցելում՝ մենա՞կ թե՞ զույգերով:

Երբեմն նրանք ուտում են միայնակ, երբեմն զույգերով և երբեմն նույնիսկ խմբով: Այնուամենայնիվ, նրանք միշտ վերջնական որոշումներն ընդունում են ամբողջ թիմով՝ հավաքականորեն:

Որքանո՞վ է կարևոր միջազգային փորձը տեսուչների համար:

Բոլոր տեսուչները ուղարկվում են աշխարհով մեկ՝ ուտեստներ փորձելու այն երկրներում, որտեղ նրանք ներկայումս անում են MICHELIN ուղեցույցներ: Դա ապահովում է, որ բոլոր տեսուչները գնահատեն նույն չափանիշներով և ունենան նույն ուղենիշները։ Միշլեն աստղը պետք է նույն նշանակությունը ունենա, և ունենա նույն արժեքը՝ անկախ նրանից, թե աշխարհի որ ծայրում է այն գտնվում:

Ցանկացած ռեստորան կարո՞ղ է համապատասխանել պահանջներին

Այո, ցանկացած ոճի և խոհանոցի ցանկացած ռեստորան կարող է որակավորվել աստղ ստանալու համար:

Արդյո՞ք ռեստորանները պետք է դիմեն աստղ ստանալու համար:

Եթե ​​ռեստորանը ներկայումս գտնվում է MICHELIN ուղեցույցում, ապա այն աստղի համար դիմելու կարիք չունի, քանի որ ուղեցույցի բոլոր ռեստորանները պարբերաբար վերագնահատվում են: Ցանկացած ռեստորան կարող է խնդրել դիտարկել նրան MICHELIN-ի ուղեցույցում ներառելու համար ( եթե իհարկե տվյալ երկիրը արդեն MICHELIN-յան գոտում է ):

Եթե ​​շեֆ-խոհարարը հեռանում է, արդյոք ավտոմատ կերպով հեռացվում է աստղը:

Պարտադիր չէ, այս մասը շատ ինդիվիդուալ է: Ըստ MICHELIN-ի պաշտոնական կայքի MICHELIN աստղերը շնորհվում են ռեստորանին, ոչ թե խոհարարին: Երբեմն ռեստորանը ներկայացնում է իր սու- շեֆին, որն իր տաղանդով չի զիջում Շեֆին։ Տեսուչները պարզապես կվերադառնան ռեստորան, որպեսզի համոզվեն, որ բոլոր ուտեստները առաջվա նման բարձր որակի են։ Եթե Շեֆ խոհարարը շատ հայտնի է և ռեստորանին շնորհված է երեք աստղ, ապա հավանականությունը մեծ է, որ ռեստորանը կարող է զրկվել աստղերից:

Կա՞ արդյոք հատուկ չափանիշներ, որոնց պետք է համապատասխանի խոհանոցը:

Որևէ գաղտնիք չկա- նրանք պարզապես հիանալի խոհանոց են փնտրում: Միշլենի որոշ աստղեր նորարարական են, որոշները՝ ավանդական, ոմանք առաջարկում են ընտրացանկ, մյուսները à la carte։ Կան պատահական վայրեր, կան պաշտոնական: Ամեն աստղային ռեստորան չէ, որ դուր կգա բոլորին, և դա այդպես էլ պետք է լինի: Նրանք միայն ցանկանում են ասել, որ աստղով աստղերով շնորհված ռեստորանները լավագույն ուտեստներով ռեստորաններն են, որտեղ դուք կվայելեք հիանալի ճաշատեսակներ:

Ինչու՞ են հետ վերցնում աստղերը:

Նրանք պատրաստում են ուղեցույցները իրենց ընթերցողների համար։ Այնպես որ, եթե նրանք զգան, որ ռեստորանում խոհանոցն այլևս նախկին մակարդակի վրա չէ՝ հաջորդ տարի նրանք կրկին աստղ չեն շնորհի։

Պե՞տք է լինել արդյոք ֆայն դայնինգ ռեստորան աստղ ստանալու համար:

Ուղեցույցի մասին ամենամեծ սխալ պատկերացումներից մեկն այն է, որ նրանք նախընտրում են ավելի պաշտոնական ռեստորաններ: Սա հավանաբար 30-40 տարի առաջվանից եկած-մնացած տպավորություն է, երբ եվրոպական քաղաքների մեծ մասում լավագույն խոհանոցը պաշտոնական ռեստորաններում էր: Այժմ աստղեր կան տարբեր ոճերի ռեստորաններում:

Ի՞նչ է տեղի ունենում, երբ ճաշում եք ռեստորանում, իսկ հետո պարզում եք, որ շեֆ- խոհարարը բացակայում է:

Մի անգամ հայտնի խոհարարին հարցրել են. «Ո՞վ է պատրաստում, երբ դու բացակայում ես», ինչին նա պատասխանել է․ «Նույն մարդիկ, ովքեր պատրաստում են, երբ ես այստեղ եմ»: Նրանց չի հետաքրքրում, թե ով է պատրաստում, գլխավորն այն է, որ այն լինի նույն մակարդակի վրա, ինչպես միշտ։ Եվ հիշեք, աստղերը տրվում են ռեստորանին, ոչ թե առանձին շեֆ - խոհարարին:

Ո՞րն է տարբերությունը 1, 2 և 3 Michelin աստղերի միջև:

MICHELIN-ի մեկ աստղը շնորհվում է այն ռեստորաններին, որոնք օգտագործում են բարձրորակ բաղադրիչներ, որտեղ անուշաբույր ուտեստները պատրաստվում են հետևողականորեն բարձր չափանիշներով:
MICHELIN-ի երկու աստղ է շնորհվում, երբ խոհարարի անհատականությունն ու տաղանդը արտացոլվում են հմուտ պատրաստված ուտեստների մեջ. նրանց սնունդը նուրբ է և ոգեշնչված:
MICHELIN-ի երեք աստղը նրանց ամենաբարձր պարգևն է, որը շնորհվում է խոհարարներին իրենց մասնագիտության գագաթնակետին՝ գերազանց խոհանոցի համար: Նրանց խոհարարությունը բարձրացվել է արվեստի աստիճանի, և որոշ ուտեստներ համարվում են դասական:

Ի՞նչ այլ խոհարարական մրցանակներ կան MICHELIN ուղեցույցում:

Bib Gourmand-ը նրանց մրցանակն է՝ գնի և որակի հիանալի հարաբերակցության համար, որն ընդգծում է մատչելի գնով ճաշ պատրաստելու պարզությունն ու վարպետությունը: Green Star-ը  MICHELIN-ի նորագույն մրցանակն է: Այն ներկայացված էր MICHELIN France ուղեցույցում 2020 թվականին, իսկ այժմ ներկայացված է MICHELIN ուղեցույցում ներառված բոլոր երկրներում: Այն շնորհվում է ռեստորաններին, որոնք օրինակելի են, երբ խոսքը վերաբերում է կայուն գաստրոնոմիային:

Խորհուրդ երիտասարդ շեֆ- խոհարարներին MICHELIN ուղեցույցի Մեծ Բրիտանիայի խմբագրական թիմի կողմից

1. Լավ սնունդը սկսվում է լավ բաղադրիչներից, այնպես որ օգտագործեք լավագույն բաղադրիչները, որոնք կարող եք գտնել՝ լինի դա լոլիկ, թե հավ:
2. Ձեր հաճախորդների համար եփեք հաճույքի համար, այլ ոչ թե պարգևների:
3. Կերեք դրսում այնքան, որքան կարող եք, բայց կերեք նաև ձեր սեփական ճաշատեսակները։ Երբեմն ճաշատեսակի միայն կեսը ուտելուց հետո եք հասկանում, որ այն այնքան էլ ճիշտ չի պատրաստված։

Շարունակելի...